13 กุมภาพันธ์ 2554 18:39 น.
สุรศรี
ฮักเฮา....ฮักโลก
เพิ่นว่าสู่มื้อนี้...........................โลกเฮาบ่คือเก่า
ลางเทื่อหนาวลางเทื่อฮ้อน.......แผ่นดิ้นปี้นกะส่างมี
ออสเตรเลียน้ำกะท่วม.............เฮอริเคนลมใหญ่
ไฟไหม้ป่าอีกซ้ำ......................กรรมซ้ำกะส่างมี
อเมริกาหิมะย้อย......................หมอกเหมยรินสองเดือนล่วง
บ่เคยดนคือจั่งซี้.......................แนวนี้กะหากเป็น
ขี้ตมเลนกะไหลอาบ...............จากภูผาใหญ่
คนล้มตายเป็นร้อย..................น้ำตาย้อยหย่าวทรวง
โลกเฮาสู่มื้อนี้.........................ผันแปรบ่แท้เที่ยง
ควรที่เฮามนุษย์โลก................หาทางแก้ส่อยกัน
หาทางแก้โลกฮ้อน..................ลดมลภาวะ
ลดขยะอย่าทำลาย...................ใซ้กันให้มันคุ้ม
พลังงานประหยัดใซ้................ฟืนไฟให้คิดอ่าน
พลังงานแห่งเหลือน้อย............คอยสิใซ้กะบ่เป็น
โลกเฮาคือหน่วยแก้ว...............ใสเฮืองเฮืองที่เหลืออยู่
มรดกหยาดจากฟ้า..................ประทานให้หมู่เฮา
คันสลายกลายเป็นเซี่ยง..........ไปไสนอบ่อนลี้อยู่
ย้านแต่ตายเหมิดเกลี้ยง...........แนวเซื้อมนุษย์เฮา....พี่น้องเอย...
......................................................
ความหมาย
ลางเทื่อ..........บางที
บ่คือ................ไม่เหมือนเดิม
แผ่นดินปี้น......แผ่นดินไหว
ลมใหญ่............พายุใหญ่
กะส่าง..............แปลกประหลาด
หมอกเหมย......หมอกควัน
ล่วง..................ผ่านมาแล้ว
จั่งซี้.................เป็นแบบนี้
ส่อยกัน............ช่วยเหลือกัน
ย้อยหย่าวทรวง...น้ำตาตกใน
เฮือง ๆ..............เรืองรอง
บ่อนลี้...................ที่หลบซ่อน
อยู่ไส................อยู่ไหน
เหมิดเซี่ยง........หมดเกลี้ยง
แนวเซื้อ............ชาติพันธุ์
.....................................................
หวัดดีครับ
ในวันแห่งรักนี้ นอกจากเราจะรักตัวเอง รักครอบครัว รักประเทศ
รักพี่น้องร่วมโลกแล้ว....ที่สำคัญเราต้องรักโลกเราให้มาก ๆ ครับ
อย่ารักแต่ปาก พอจะช่วยอะไรได้อย่ารีรอ ลงมือทำทันที เพียงสิ่งเล็ก ๆ
น้อย ๆ ถ้าทุกคนช่วยกัน มันจะช่วยได้ครับ
รักทุกคน
นายสุรศรี
7 กุมภาพันธ์ 2554 16:45 น.
สุรศรี
อย่าไปง้อ..............ตอเรส
เพิ่นว่าสองสลึงอยู่ฟากน้ำ..............อย่าฟ้าวโอ่คะนิงหา
สตางแดงเฮามี...............................ให้ค่อยกำเอาไว้
เสียตอเรสไปแล้ว..........................บ่แม่นแนวอย่าคิดฮอด
ซัวร์เรสยังอยู่ค้ำ.............................ทางก้ำฝ่ายหงส์
อย่าไปหลงอ่าวโอ่.........................หมากแตงโมอยู่บ้านเพิ่น
บักแตงซ้างมีบ่แพ้..........................สิหวลโอ้อ่าวอิหยัง
หงส์คือหงส์คำห้าง........................เป็นหงส์ทองคือจั่งวา
หงส์ยังบินเซิ่นฟ้า..........................บ่หลงบ้าเหยียบขี้ตม....ดอกนา
ยังมีแฮงบุกสู้.................................สิงโตบ่ได้ย้าน
แข่วเล็บสิงห์มีบ่แพ้.......................ยังบุกถ้ำไปยาดเอา
เห็นอยู่บ่พี่น้อง..............................หงส์ทองยังกล้าแกร่ง
หงส์แดงยังอยู่ได้...........................บ่เห็นง้องึดผู้ได๋
มันอยากไปกะไปโลด...................บ่โกรธเคืองจักกะหน่อย
ปากมันหวานปานน้ำอ้อย..............หวานจ่อยจ่อยบ่อยากไป
วันคืนอยู่ข้างหน้า..........................นาฬิกายังเดินย่าง
หงส์ยังอยู่ค้ำฟ้า.............................บักแตงซ้างหน่วยปลาย....ดอกเด...พี่น้องเอย
3 กุมภาพันธ์ 2554 08:27 น.
สุรศรี
โอ้นอ....
คือจั่งฟ้าผ่าเปรี้ยง................แตกเป็นเสี่ยงนอหัวใจ
แสนอาลัยย้อนคิด..............ฮ่ำคะนิงนำเจ้า
เสียงข่าวลือดังจ้นจ้น.........เสียงผู้คนเขาส่า
ว่าตอเรสเจ้าอยากย้าย.......จากน้องอ้ายว่าจั่งได๋
ในหัวใจยัวเซื่อเจ้า............บ่หูเบาตามเขาส่า
ว่ากองหน้าอย่างเจ้า..........อยากหนีเข้าซบเชลซี....ซั่นบอ
มื้อสุดท้ายจั่งได้ฮู้.............แสนหดหู่ในหัวใจ
เจ้ากะไปอีหลี..................อยู่เชลซีทีมพุ้น
จั่งแม่นคูณหลายนอหล่า..อยากย้ายมาบ่บอกพี่
คือบ่บอกแต่กี้.................เฮ็ดจั่งซี้แปลกใจหลาย
นี่มาบอกมื้อสุดท้าย.......ว่าบ้ายบายลาไปก่อน
สุดออนซอนสิงโตเจ้า.....เขาสิสร้างฮ่วมฝัน
ทีมในหัวใจเจ้า..............เขาสิให้อนาคต
เขากำหนดให้ได้...........หลายแชมป์ให้ล่าฝัน.....ซั่นบ้อ
โอ้นอ....หงส์แดงเอ้ย......
เพิ่นว่างัวบ่กินหญ้า...........แสนสิข่มกะเขาหัก
คันแม่นหมูบ่กินฮำ..........แสนสิตีกะดังเว้อ
เขาบ่อาลัยแล้ว................เซือกสามแกวผูกบ่อยู่
แสนสิล่ามโซ่ไว้.............ขังได้กะบ่ยอม.......ดอกเด้อ
สามกว่าปีอยู่ในค่าย.......แอนฟิวบ่อนเจ้าอยู่
บ่มีสุขบ่หล้า..................โตน้องจั่งอยากไป
แชมป์พรีเมียร์กะบ่ได้....เอฟเอคาร์ลิงคัพ
บ่ได้จับนำเขา................หงส์เฮาบ่มีลุ้น
เปิดฤดูกาลนี้.................หงส์เฮาแห่งตกต่ำ
เปลี่ยนผู้นำกะแล้ว........แมตหน้าจักจั่งได๋
เปรียบจั่งเรื่อสิล่ม.........จมลงแม่น้ำใหญ่
เจ้าถีบหัวส่งซ้ำ............เรือลำนี้กะส่างเป็น
เห็นว่าทีมเหมิดลุ้น.......ลืมบุญคุณกะตามส่าง
สิค่อยถางค่อยไง้..........ไปเมือหน้าสิสร้างฝัน
ลืมคืนวันอันเลวฮ้าย......บ่เดียวดายดอกน้องพี่
ลืมโลดคนจั่งซี้.............บ่มีค่าให้คิดนำ
เฮามากำมือสร้าง..........ถางถางไว้เทียวไต่
สามัคคีกันไว้...............ไปภายหน้าหากสิเห็น
ดวงตาเว็นยังส่องฟ้า....จันทร์ดารายังใสส่อง
ให้เฮามองเห็นได้.............สร้างทีมให้ฮุ่งเฮือง
ซุมซาวเมืองยังกึกก้อง.....ยังฮ้องเซียร์อยู่คือเก่า
บ่ทันเป่านกหวีดซ้ำ.........สิยอมแพ้ได้จั่งได๋
บ่มีเดียวดายดอก.............จับมือกันฟ้าวย่าง
ยังมีทางสิได้..................เนเว่อร์วอล์คอะโลน......ดอกนา...หงส์เอ้ย......
............................................................................
หวัดดีครับ
ไม่ได้แต่งผญามานานครับแต่ปีกลายโน้น ลองหยิบมาแต่งเป็นเรื่องที่อินกับเขานิดหน่อยครับผม
ไม่มีอะไรมาก
แปลความหมาย
คือจั่ง......เหมือนดั่ง
ย้อนคิด....เพราะคิด
ฮ่ำคะนิง......อาลัยอาวรณ์
จ้นจ้น......เสียงดังอึกทึก
ส่าลือ......ร่ำลือ
เซื่อ.......เชื่อ
จั่งได๋.......อย่างไร
จักจั่งได๋....ไม่รู้จะเป็นอย่างไร
แห่งตกต่ำ....ยิ่งตกต่ำ
จั่งแม่นคูณ......ช่างดีเหลือเกิน เป็นคูดประชดครับ(คูณหมายถึงสิ่งที่ดีสิ่งที่เป็นมงคลต้น คูณหมายถึงต้นราชพฤกษ์ เป็นไม้มงคลของชาวอีสานด้วย เวลาปลูกบ้านยกเสาเอกมักนิยมผูกใบคูณกับใบยอเพื่อวามเป็นศิริมงคลครับ)
เฮ็ดจั่งซี้......ทำอย่างนี้
ซั่นบ้อ ซั่นตี้....อย่างนั้นหรือ
ฮ่วมฝัน.....ร่วมฝัน
กะส่าง.....ก็ช่าง
เหมิด.....หมด
ฮ้าย......ร้าย
ฮุ่งเฮือง......รุ่งเรือง
สิค่อยถางค่อยไง้....ค่อยถากถางหนทาง
ซุม......พวก หมู่
ฟ้าว......เร่งรีบ
ฮำ.........รำ
ดังเว่อ.....จมูกบาน
เซือกสามแกว......เชือกสามเสนพันเกลียวเป็นเส้นเดียวกัน
หน้าส่วนตัว
2751
