เจ็บท่อกัน

ยังเยาว์

เฮ็ดบ่ได้ดอกอ้ายให้คลายฮัก
ย้อนน้องปักเหมิดใจเป็นใยสาน
คืออ้ายฮักภักดิ์นำเป็นตำนาน
คงฮักนานฮักแท้แน่อุรา

ทราบอยู่ดอกซึ้งหลายที่อ้ายมอบ
บ่อาจตอบแทนฮักสักผลา
ย้อนฮู้ดีฝ่ายน้องผู้ต้องตา
คิดเห็นหน้าบ่แม่นเจ้าคนเฝ้ารอ

หลงฮักเพิ่นข้างเดียวเปลี่ยวดวงจิต
เถิงสิไร้อภิสิทธิ์บ่คิดขอ
แค่ส่ำนี้น้อยหนึ่งซาบซึ้งพอ
บ่เคยท้อห่วงใยให้ตราตรึง

บ่ฮู้ยืนมุมใด๋ในใจดอก
แต่ยอมออกหลบมุมซุ่มคิดถึง
เฮ็ดแจ่งใด๋ฮักแต้มแกมรำพึง
ใจสิขาดบ่อาจดึงหยุดซึ้งตาม

เจ็บคือกันท่อกันนั่นล่ะอ้าย
มันเป็นฮ้ายปานใด๋อย่าให้ถาม
ฮู้อยู่...ฮู้ดีเจ็บกี่ยาม
เหมิดสิทธิ์ดามแผลร้าวคาวน้ำตา

บ่ขออ้ายให้ลืมตื่มกันดอก
สิบ่ตอกย้ำอ้ายให้ขายหน้า
ฮักคือฮักคิดฮอดตลอดมา
คงเส้นวาม่องเก่าที่เขาควร

คันมื้อหน้าพ้อไผอย่าไลลับ
ลองเปิดฮับเบิ่งเขาหยุดเฝ้าหวน
ค่อยค่อยคบเฮียนฮู้ดูทบทวน
อย่าฟ้าวด่วนคิดซ้ำตัดสัมพันธ์

ตอบบ่ได้เป็นหยังคือยังฮัก
ใจทุกข์หนักทรมานพาลโศกศัลย์
คืออ้ายเลี่ยงบ่กล้ามาประจัน
เซาฮักกันได้บ่ขอถามแหน่
.................................

ตอบบ่ได้คือเซาฮักเขาบ่ได้
คือกับอ้ายตอบบ่ได้คือเซาฮักน้องบ่ได้

อ้ายฮักน้อง น้องฮักเขา เขาฮักไผ

เพลง:อินแฮง
ศิลปิน:ไอดิน อภินันท์

ใจอ้ายยังฮักบ่มีเปลี่ยนแปลงอินแฮงเด้หล่า
สิให้อ้ายเฮ็ดคือบ่หัวซายามน้องสิลาอ้ายไป
คบกันมาตั้นนานฮักน้องเเหมิดหัวใจ อ้ายเฮ็ดบ่ได้อีหลี 

น้องเดินมาขอให้ลืมความหลังที่เราเคยมี
และบอกเหตุผลว่าเจอคนดีเวิร์คกว่าที่เฮาคบกัน
ขอให้อ้ายหยุดฝันขอให้เฮาจบกันมันบ่แม่นของง่าย

*อ้ายยังลืมน้องบ่ได้อ้ายขอเวลาทำใจ
ฮู้อยู่ว่าฮักนั้นคือการให้ 
อ้ายสิพยายามลืมน้องให้ได้แต่มื้อนี้
หัวใจยังไม่มีวี่แววจะลืม

ใจอ้ายยังฮักบ่มีเปลี่ยนแปลงอินแฮงลืมยาก 
ช่วยต่อเวลาให้อ้ายตั้งหลักจักหน่อยแน่เด้อคนงาม 
พออ้ายบ่ขาดใจพออ้ายทันบอกใจ
ให้ลืมน้องได้จักหน่อย 

ซ้ำ *

ให้ลืมน้องได้จักหน่อย