29 กันยายน 2552 10:01 น.
036646
น้ำตกแจ้ซ้อน เมืองปานบ่ไกล๋ จากตั๋วเมืองไป หนเหนือเล็กหน้อย
เจ็ดสิบกิโล เน้อนายยอดสร้อย ขอเจินไปกอย แอ่วผ่อกำเต๊อะ
น้ำตกเป๋นฝอย หอยมีป่าเลอะ ผ่อหันป๋าปู๋ นักหนา
น้ำตกแปดจั้น ลดหลั่นหินผา โถมถังมา กึกก้อง
ผาเงิบผาจั๋น เป๋นหลั่นเป๋นห้อง เป๋นฝอยเป๋นฟอง แตกปุ้งกระจาย
เสียงเหมือนดนตรี หันรุ้งเป๋นสาย สีเหลืองม่วงคล้าย เขียวแดง
งามแต้งามนัก เหมือนอินทร์แต่งแป๋ง ต๋า วันตกแลง นกฮ้อง
นกเป้านกงูม จ้างหุ้มขันถ้อง ผ่อตั๋วหัวปอง ใหญ่หน้อยเรียงราย
แขกเต้าแลหลาว ปากั๋นโน้มน้าว ต๋ามกิ่งก้านไม้ ป่าดง
โป๊กซางไล่เป๊าะ สีสุกหนามหลง ไม่เฮี๊ยะฮวกบง ไผ่นั้น
บ่าก๊ายคอแลน บ่าแหนบ่าหมั้น บ่าม่วงบ่าตัน มีนักเป่อเลอะ
เถิงเวลาสุก หล่นตกเน่าเบ๊อะ กิ๋นกั๋นบ่เสี้ยง นักหลาย
อุทยานแจ้ซ้อน น้ำฮ้อนหลายสาย บุ่นออกจากทราย ปุ้งขึ้น
เป๋นโรคผิวหนัง อยู่ลึกอยู่ตื้น ขี้กากแดงวื่น ซะป๊ะผ่างฮ้าย
อาบน้ำแร่เหีย ก๋ำจัดโรคร้าย ได้หายหมดเสี้ยง ก๋ายา
ขอเจินปี้น้อง เปื้อนป้องตั้งหลาย ตึง ญิ๋งตึงจาย มาแอ่ว
จะได้ป๊ปกับ ธรรมชาติบ้านเฮา ของ ดีแต้เหล้า เล่าลือมานาน
โดย นายโยธิน ดวงแก้ว
ม.6/8 โรงเรียนบุญวาทย์วิทยาลัย
จังหวัดลำปาง
29 กันยายน 2552 09:55 น.
036646
บุญ คุณของแม่ นั้นแลยิ่งนัก แม่เป๋นตี้ฮัก ของลูกเหลือหลาย
แม่อิดแม่ตุ๊ก แม่บ่สบาย หื้อลูกญิ๋งจาย ได้กิ๋นได้อิ่ม
จะ ตุ๊กเต้าใด แม่ก้อสู้ยิ้ม หื้อลูกได้อิ่ม กู่มื้อ
แม่เป๋นเหมือนพระ เคารพนับถือ กำสอนแม่คือ กำดี
หวังหื้อลูกใหญ่ มีศักดิ์มีศรี หื้อเป๋นคนดี ของแม่เน้อเจ้า
แม่ อิดบ่ว่า ยะก๋านตั้งเจ๊า ขอหื้อลูกเต้า สบาย
วันนี้บอกแม่ ว่าฮักมากหลาย หื้อแม่สบาย อยู่ดี
ขอหื้อตั๋วแม่ อยู่สุขเป๋นศรี ได้กิ๋นหลับดี ความตุ๊กบ่ใกล้
ถ้าลูกล่วง เกิ๋น สูมาอภัย บ่มีไผไหน นักแล
ขอ ท่านตั้งหลาย หื้ออยู่สุขี หื้อมีเงินใจ้ ไหลมา
ขอจบวาจ๋า ค่าวฮ่ำกำซอ สุดเสี้ยงเต้าอี้ ก่อนแลนายเหย
โดย นายโยธิน ดวงแก้ว
ม.6/8 โรงเรียนบุญวาทย์วิทยาลัย
จังหวัดลำปาง
หน้าส่วนตัว
1826
