***ค่าวนิทาน***

ถนปายี

เจิญฟังก่อนสาน นิทานลั๊วะจ้อย ตั๋วข้าม่อนน้อย หนานใจลังก๋า
ได้ฟังค่าวลั๊วะ ม่วนคืนนักหนา จึงจ่ำเอามา เล่าจ๋าบอกอู้
เพื่ออ่านแก้เหงา หมู่เฮาทั่วผู้ ขอหื้อฟังดู ดั่งนี้

ก๋อนกำจ๋า หมาเล่นอุ่มลี้ แมงมะหนี้ จ๋ามไอ
อึ่งอ่างขี้ค้าน ปกก้อนขี้ไถ จ้างมาดักไซ ได้แผวจุ่งจี้
แม่ไล่กิ๋นหมา มาหันเหียหนี้ หนูสูบมูลี ขี่แป๊ะ

มดลิ้นตั้งจ๋ำ มดดำส้อนแซะ เลยแวะแอ่วอู้ งูเปา
ไผเกยจ่ายฮู้ ขี้คู้มีเขา จะเข็บแมงเวา ลักเมาหี่งห้อย
ฮิ้นยุงกิ๋นเกลื๋อ จ๋นปอเป็นด้อย จะเล้อดาปอย บวชพระ

จั๊กก่าหัวเขียว ฮากเลือดยาซะ จ๋นสุกบ่อได้ นอนกาง
ปวกกั้นกะทิ เอาใส่ยาขาง อี่ฮวกเป็นซาง ฮ่างผอมแก้งแด้ง
อี่โหวดเก้าผม ลิงลมตาแป้ง หอยเก็ดแดง แอ่นฟ้อน

คางคกนั่งเหง้า โศกเศร้าเดือดฮ้อน บ่มีกู้อ้อน นอนแยง
ก่ำเบ้อก่ำปุ้ง ไห้กิ่นบ่าแต๋ง แมงสาบแมงแกง จ่างแป๋งก่องเข้า
แมงเม่ากั๋วฝน แมงงนกิ๋นเหล้า จ๋นปอเมา ฮากต๊น

แฮ้งต๊กเก้าต๋าล ขาห้านแข้งโก้น ไปไหนบ่ได้ สามเดือน
กว่างแม่เขาโซ้ง หุงต้มข้าเปี๋ยน อิ่นดูขี้เดือน ผะเลิดต๊กห้วย
นกเอี้ยงขี้หมา จาต๋าแส้งส้วย ถูกหวยรางวัล เลขท้าย

ซ้ำอ้นกับเห็น ลักเล่นจั่วพ้าย ตี้ปอยจั๊กกิ้ม ต๋ายจอย
ป๋าค้าวป๋าเต๊าะ ก๊บเขียดปู๋หอย ไปจ้วยดาปอย ตี๋ก๊องโม้ง ๆ
วอกก้างเสือหมี นกจี๋แจ๊บโก้ง ฟ้อนกั๋นรำวง เยิบ ๆ

ป๋าปกป๋าขาว ตั๋วยาวเติ้บเปิ้บ ตั้งใจ๋อยู่หั้น ฟังซอ
จะเข้เลี๊ยะพ่ะ ป๋าลิ๊ดป๋าขอ ลูกหมาจ๊อกวอ เป๋นว้อกะด้าง
จี้หีดจั๊กแต๋น เต่าแลนคิดสร้าง จะแป๋งโฮงงาน แข่งมด

แมงม้าหางงอน เปิ้นได้เลื่อนยศ ติ๊ดใส่บั้ง สิ๊บโท
นกจอกนกเก๊า เป๋นเจ้าโมโห สับหัวโต๊กโต เอาปู๋นก่านหน้า
มดง่ามเสี้ยงใจ๋ ควายต๋ายเบื่อหญ้า เขียดอี่จา แก้นน้ำ

แมงพิ้งหลบภัย ไปไกล๋เจ้นล้ำ อยู่แผวตี้ถ้ำ ผาไท
หอยโข่งจ้ำบ๊ะ บ่ฮู้อายไผ งูน้ำงูไซ ดังไฟห่อหนี้ง
เผิ้งมิ้นต่อแต๋น หน้าแดงปึ้งลึ้ง ส่งเสียงเอ็ดอึง โห่ร้อง

แมงบ้งออกใส แมงใบ้ลุ๊ต้อง หมูแม่ด้อง ต๋ายมาน
อึ่งนิมนต์แย้ ไม่ส่งสะก๋าร เป็ดไก่กว๋างฟาน บวชจุ๋งตวยก้น
เต่าน้ำป๋าฝา ไห้หาจ้น ๆ ตื้บ ๆ โยน ๆ จ่มตุ๊ก

ฮอหสิกจุ่งจา ก๋าเล่นหมากรุก จ๋นลืมคาบข้าว แลงงาย
วอกเฒ่าพี่ทิด สลิดเหมียนต๋าย มีนโยบาย จะขายพริกแด้
ขี้กุ่งแมงจอน หอนดังแผดแผ้ นกเป้านกแล ก้าโล่

ป๋าหลาดป๋าเข็ม เป็นตุ่มขี้โม้ ถูกมัดใส่โซ่ นอนควาย
หมาโก้งเซ็งลี้ ก่ำไฮแสนป๋าย เปิ้นยับวัวลาย เป็นแนวที่ห้า
หนูปุ๊กกิ๋นไถ ขะตู้กิ๋นกล้า ปี้หนานแมงดา ฟ้อนเงี้ยว

กุ้งขายก้วยเตี๋ยว ป๋าทูขายเกี๊ยว ถ้วยสองบาทถ้วน ราคา
เสือเล่นพ้ายป๊อก มอดรับค่าต๋า ฟ้องศาลอาญา ถูกปรับซาวเก้า
ลูกคอกป๋าต๋อง ต๋ายละลูกเต้า แมงป่องแมงเวา รับเลี้ยง

ยาแฝดนางนี จ้าดดีเม็ดเฟื้อง ขายม่วนเสี้ยง หม๊ดเลย
ฮุ้งเอาอี่แฮ้ง มาเป๋นลูกเขย แมงโพงกะเทย ถูกมัดเจือกก้น
ขอจ๊บค่าวจ้อย ลั๊วะจ้อยสับสน ลำบากลำบน บ่เนาจะเสี้ยง

จะอู้ไปยาว สาวหื้อหม๊ดเสี้ยง บ่อเนาบ่อเนือง มากนัก
ขอยุติก่อน สุนทรยั้งพัก จบเต้าอี้ ปล๋งวาง........./